喺新界東參選嘅上水鄉事委員會主席侯志強，日前喺地區選舉論壇發表驚人政綱，話明支持全民退保，建議每人每月派一萬蚊，又支持廢除丁權，因為覺得所有擁有土地嘅人都可以申建丁屋。
除咗政綱，佢嘅選舉海報同樣惹爭議，有網民發現上面寫住「不遺余力，為原居民發聲」（圖），質疑標語中嘅「余」係餘字簡體，鬧佢「寫殘體字返大陸選啦！」但有網民話余喺文言文可以解做我，寫不遺余力解得通。
翻查資料，余係舍字嘅初文，本義係房舍，後借用為第一人稱代詞，我也。孫中山遺囑第一句亦謂：「余致力國民革命，凡四十年」。唔通侯志強真係俾人誤解？該區其他參選名單，請參閱本報立會選戰網站 http://hk.apple.nextmedia.com/legco2016/region 。