光大系又多一間上市公司，事關光大證券（6178）今日起招股，集資最多90億元。總裁薛峰除咗睇好A股後市，仲話相信明年上半年內地經濟見底，家陣上市集資啱晒時間。佢又預告，兩年左右會分拆香港業務上市，堅定地「走出去」咁話。
但留意番，光大系上市，成日俾人笑係大市藍燈籠。最經典就係光大銀行（6818），試足三次先成功，2011年、2012年佢兩次一準備招股，大市就跌，市況唔穩當然唔去馬喇，卒之到2013年底先上到市，但集資額比第一次招股時，縮水一半。冇計啦，一鼓作氣，再而衰，三而竭，最終上到市都好過冇嘅。
惟有希望今次光大證券會破除呢個詛咒，順順利利，最緊要唔好拖冧埋個市！