日職聯次階段未有因里奧正在進行而暫停，上周六繼續有比賽。浦和紅鑽雖然有兩名主力遠藤航同埋興梠慎三去打奧運，但表現未有因此受影響，球隊憑前鋒武藤雄樹入兩球而輕取來訪嘅湘南比馬4:1，家陣與同日大勝甲府風林4:0嘅川崎前鋒，以七戰同得19分，但得分球差冇咁好，暫居次席。
紅鑽後防冇咗正選中堅遠藤航，前線亦冇咗射手興梠慎三，但個勢冇因而減弱，上周六主場對住弱隊比馬，憑關根貴大同埋武藤雄樹入波，半場領先2:1。換邊後紅鑽繼續控制戰局，結果由槙野智章建功，加上武藤雄樹攻入今仗個人第二球，最終大勝4:1，次階段七場聯賽取得六勝一和，同前鋒一樣七戰得19分，只係得失球唔及對方而排第二位。
前鋒大勝保榜首
講開前鋒，佢哋鋒力勁到冇朋友，憑一對箭頭大久保嘉人同埋小林悠各建一功，主場大炒風林4:0，次階段七場聯賽入18球，相當厲害。
但首階段盟主鹿島鹿角就唔係咁得，主場對住仙合維加泰輸0:1，聯賽三連敗後七戰只得七分，落後前鋒同埋紅鑽12分，睇怕冇乜機會做埋次階段盟主。