【好去處】90分鐘金山公園遊　睇勻四大百年水塘

天氣悶熱，熱到唔想做室外運動，何況行山？不過識得揀路線，其實夏日一樣可以行山避暑。金山郊野公園內有多個水塘，有九龍水塘、九龍副水塘、九龍接收水塘，還有一個石梨貝水塘，到處是林蔭小徑，時而有溪澗、時而途經竹林，完全唔會覺得好熱。

金山郊野公園算是熱門行山地點，行山友通常經郊野公園上針山，亦是每年約11月舉辦的樂施毅行者必經之路，許多人都會把握時間到針草帽（即針山、草山、大帽山）練體力。不過今次純為避暑，自然要輕鬆上陣。來到大埔道的石梨貝水塘站，沿旁邊的長源路出發，短短90分鐘，可欣賞四座水塘的湖山風光，靚得來其實又不盡相同。水塘的水壩及水掣房閒閒哋都有近百年歷史，周圍都是歷史建築，九龍水塘更是法定古蹟。看起來悠閒的行山路線，原來也隱藏了許多歷史故事。