運動員想攞到資格出戰奧運並唔容易，而運動員嘅家人想陪住囝囝囡囡周遊列國咁比賽就更加難！話說美國男子鉛球選手希爾，因為太窮嘅關係，冇能力買機票畀老竇伊利斯去巴西睇自己比賽。不過作為Uber司機嘅伊利斯喺上周開工期間，同一個叫莉絲嘅客人提起呢件事之後，莉絲竟然喺網上幫佢集資7,500美金（約58,160港元）買機票，等佢可以親身見證囝囝為國出戰奧運，真係勵志！