我求大俠提提大家，唔好淨係掛住睇奧運，歐洲球季已經返嚟嘞！前日英冠率先開鑼，誓言重返英超嘅紐卡素先吃一記悶棍，作客以0:1輸咗畀上季排下游嘅富咸，真係一盤冷水照頭淋。領隊賓尼迪斯今夏降班都使咗幾千萬鎊增兵，如果下場唔贏，我求大俠怕奧運都未完，肥賓就被班主艾殊利炒魷。
使成四億買水貨
紐卡素今季降落英冠，但全隊誓言要即刻返上英超，唔止留住領隊肥賓同好多主力，仲使咗成4,500萬鎊（約4.6億港元）增兵，班費拍得英超啲中小型班。雖然柏比斯施斯同韋拿杜姆走咗，但喺上周五對富咸嘅開鑼戰中，「喜鵲」都大把新兵用，例如價值1,000萬鎊嘅前水晶宮射手杜韋加爾，同埋1,200萬鎊嘅前般尼茅夫中場馬特列治。佢兩位都正選披甲，馬特列治都尚算對辦，紐記全場僅有嘅兩腳中目標埋門都係靠佢，至於杜韋加爾真係形同虛設，踢中鋒竟然一次射門都冇。
不敵中下游富咸
紐記呢場控球較多，但射門就冇乜威脅，喺完上半場前，仲被富咸靠角球攻勢搞掂。富咸射手馬特史密夫接應卡亞尼嘅角球，頭槌攻門，頂破紐記新門將素斯嘅十指關，為主隊開紀錄。而紐記後備力量都唔差，下半場先後換入路蘭度艾朗斯同前英格蘭國腳舒維爾，但最後都無法追平。紐記首場英冠敗陣，重返英超嘅鴻圖大計食咗一記悶棍。今場對手富咸亦唔係爭升班分子，佢哋上季喺英冠只係排第20位。
領隊肥賓就話呢場波係當頭棒喝，家陣醒晒：「一開波我哋踢得有啲緊張，喺下半場發揮亦唔好，呢場係一個警告，提醒我哋往後嘅比賽會更難踢。」富咸中場賴恩端尼基夫喺上半場涉嫌禁區內手球，但球證冇判12碼，肥賓就話：「我唔會搵任何藉口，我哋要進步，同埋要信球證，雖然佢哋會判錯。」紐卡素下輪返聖占士公園主場，對上季排第19位嘅哈特斯菲爾德，如果紐記再有乜冬瓜豆腐，我求大俠真係怕肥賓帶英冠都被人炒，到時冇眼睇啦。