吳剛師傅點解轉咗行做運動員，仲要做埋湯加嘅持旗手嘅？睇真啲，呢位上身赤裸兼且搽晒油嘅大隻男，唔係以前成日喺《歡樂滿東華》表演食炭同飲滾油嘅吳剛師傅，而係湯加嘅跆拳道選手杜法度夫亞呀。
搽晒油成開幕禮焦點
杜法度夫亞以「吳剛師傅」造型，參加噚日朝早嘅里奧開幕典禮，令佢紅爆全球，風頭拍得住俾國內傳媒封為東方維納斯嘅淳BB囉。而佢將會喺8月19日出戰男子跆拳道80公斤以上級賽事，大家到時記得幫佢打氣呀！
噚日朝舉行嘅里奧開幕典禮，當湯加進場嘅時候，好多人都睇到嘩嘩聲，部份女觀眾仲應該會口水都流埋。湯加個持旗手杜法度夫亞以「吳剛師傅」造型登場，上身冇着衫兼且仲搽晒油，嗰吓即時令佢成為焦點人物。
咁講真，大隻唔係大晒嘅，仲要睇吓個樣得唔得，杜法度夫亞除咗身形得之外，望落都算幾靚仔，結果佢就一夜紅遍全球，每個角落都有人講緊佢，其中日本《朝日新聞》仲以「謎之筋肉男」嚟形容佢㖭；甚至有網民認為，家陣全世界都識得佢，佢經已贏咗今屆里奧第一金喇。
杜法度夫亞成為里奧紅人，梗係要起起佢底啦。原來佢現年32歲，喺澳洲出世，但就選擇代表老竇嘅國家湯加比賽。之前北京同埋倫敦奧運佢都入唔到圍，不過今年四月，佢終於攞到奧運資格，可以去巴西玩里奧，成為首個出戰奧運嘅湯加跆拳道選手，仲會喺8月19日登場比賽，但就俾外國莊家威廉希爾列為126倍嘅大冷門。佢喺自己Instagram寫咗段非常勵志嘅說話，話自己夢想成為奧運跆拳道金牌得主，仲話正為夢想而努力，如果佢可以做到，大家都可以。
伊朗女持旗手創歷史
講番噚日朝個開幕典禮，伊朗持旗手妮瑪迪亦係焦點，呢位31歲嘅射箭選手唔係靠靚突圍，而係靠創造歷史，事關佢成為伊朗喺奧運史上第一個女性持旗手。
另外，澳洲選手身上件隊服原來內有乾坤，衫入面有齊贏過奧運金牌嘅澳洲運動員名，直頭係將澳洲奧運歷史着上身，真係有諗頭。
