里奧正式開幕，力爭三連霸嘅美國男籃亦會喺當地時間周六同中國打第一場分組賽。不過，「夢幻隊」可能覺得中國太渣，班NBA球星喺開賽前一晚竟然齊齊去妓院玩！
美國就有「狗仔網」大爆吉辛斯（DeMarcus Cousins）、D佐敦（DeAndre Jordan）、迪洛桑（DeMar Derozan）同三位隊友，偷偷地離開美國籃球隊住嘅豪華遊輪，走咗去里約一間叫Termas Monte Carlo嘅妓院，據聞呢間仲係當地數一數二嘅高檔妓院。狗仔網仲話如果有人打電話去呢間妓院，負責人只會話你知佢哋係做正當生意，畀人飲酒、聽住歌做spa，但係只會招呼男顧客囉。有消息指呢班美男隊員去到淨係飲咗幾杯，之後覺得唔啱玩就走人喎，信不信由你喇。
易建聯「頂天立地」
另外，中國代表團嘅成員想同易建聯合照就似乎有啲難度喇，女子體操隊嘅毛藝同范憶琳為咗同「易帝」合照，竟然企咗上差唔多一米高嘅花槽，三人嘅高度先變得近啲。而易帝同劍擊選手施嘉洛喺揭幕禮影相嗰陣，仲高到頂住馬拉簡拿球場嘅天花㖭。
