曾鈺成喺7月29日星期五晨早走上香港電台英文台接受訪問，只係早上七時過後啫，佢就講到假如真係冇人挑戰CY角逐特首嘅話，佢就會入閘，俾選民（即選委會）多一個真正的選擇。「一語挑起千重浪」，金句冇幾耐就傳遍全城。左丁山一知道（七時二十分左右）就有點疑惑，曾鈺成近月頻頻出鏡，不時接受傳媒訪問，做乜揀到英文台用英文嚟透露競選特首意圖呀？唔通用英文講更能表達真正意思？
跟住到咗十點，商台播出曾俊華訪問，佢又話特首係一份「衰工」（與衰公同音，莫非the pun is intended？），但係如佢能夠對社會有貢獻，佢會參選。
雙曾，一個叫做Jasper，另一位叫做John，英文縮寫同是JT，如果兩人同時參選，CY都幾頭痛，但JT可能票源有啲重叠（例如泛民選票），CY又可坐收漁人之利，如果林鄭（盛傳老董背後力撐）又出馬，CY更可買定香檳慶祝，幾乎篤定連任，除非阿爺有示意放棄佢。
競選最怕冇人爭，講吓都冇興趣，但有兩三隻馬入閘嘅話，咁又唔同，買定花生睇好戲，呢勻夠熱鬧嘞啩，朋友間飲啤酒有排講，更可賭餐飯睇邊個贏。上星期日在馬會食飯，遇到一位深梁粉絲，故意向佢挑戰話兩位JT加CL有機會趕走CY，深梁即刻同左丁山握手話：「不如賭餐凱旋廳晚飯，我夠膽講兩位JT全無機會，入閘只係陪跑，位置飛都唔駛買！」嘩，咁鬼老定，不愧係深梁，這年頭，叫人地梁粉，人地未必肯認㗎，例如中大學生稱呼校董會主席做梁粉乃鵬，梁主席每次都大力否認；但左丁山呢位朋友俾人稱呼為梁粉，佢就欣然接受嘅。呢位深梁又係賽馬粉絲啫，佢開出賠率，CY熱過買莫雷拉騎師王（即通常1.2倍以下），兩位JT嘅賠率係99倍，立此存照。左丁山問：「2017年女人當道，東京都知事大熱門小池百合子順利勝出，假如林鄭、葉劉都入閘，賠率有幾多？」深梁話：「嗱，我揸莊嘅話，林鄭20倍，葉劉60至70倍。」咦，都高過JT噃，乜睇得JT咁死？深梁又話：「其實仲有一兩隻詐傻扮懵馬未有動靜，不排除在最後一刻加入角逐份衰工！」問佢邊兩隻馬正在詐傻扮懵，深梁話不如講吓下季邊隻馬贏打吡，臨別之前，佢又潤左丁山一句：「假如去年通過政改，一人一票選特首，JT會係3、4倍嘅熱門呀！」