由美國加州前州長、著名影星阿諾舒華辛力加牽頭嘅阿諾國際體育節8月20同21日首次喺亞博館舉行，阿諾舒華辛力加仲會親自撐場。
親自來港主持座談會
主辦單位噚日請嚟兩位居港男女大力士Gary Manwaring同Santina Philips嘗試拉動重8.7噸、長6.1米嘅大卡車拖頭。20幾歲嘅Santina咬牙切齒，借助綁喺另一部大卡車嘅繩䌫拚命向前拉，成功將拖頭向前拉行10米，佢話全身有㷫烚烚嘅感覺。至於Gary就喺地上塗上强力膠防跌，仲兩次成功拉動拖頭。其實佢哋係一間叫Ursus Fitness嘅健身中心教練，呢間中心係家庭式運作，畀一班志同道合朋友一齊玩，唔係用合約形式招收會員。
今次體育節將請嚟世界各地體育明星，舉行逾20項體育競技，包括跳繩、拗手瓜、舉重、室內單車、瑜伽、賽艇、柔道、以色列格鬥、功夫等，舒華辛力加仲會親自主持座談會。詳情可以參閱 http://www.arnoldclassicasia.com/ 。