個場風平浪靜，叫人點玩激流獨木舟呀！里約奧運又有蝦碌嘢，當局臨時取消周四喺白水體育館舉行嘅激流獨木舟訓練時段，因為水泵失靈，泵唔到水，令賽道一潭死水玩唔到（圖）。嚟緊周日激流獨木舟嘅比賽就會展開，但三日前竟然壞泵，都真係幾大鑊，但當局就話好濕碎，好快就會整番好，一定唔會影響比賽。激流獨木舟會由聽日起玩到下周四，產生四面金牌。