里約熱內盧奧運喺香港時間周六朝早正式揭幕，有睇開幕禮嘅讀者，梗係會留意咁多個國家嘅隊服啦！中國嗰套俾網民彈到飛起，話紅男黃女嘅設計十足十蕃茄炒蛋咁，但其實又唔可以咁表面去睇呢套隊服，點解？因為呢套服隊令中國運動員變得強國味極濃，一望就知係嚟自強國囉。
啱晒身份 大家睇到慣
網民對美國、英國、法國同意大利嘅里奧服隊都有讚冇彈，咁梗係啦，人哋國家非常有誠意，搵嚟Ralph Lauren、Stella McCartney、Lacoste同埋Giorgio Armani等歐美著名時裝設計師品牌去度身設計，一睇就知係好嘢，當然冇得輸啦。至於瑞典同加拿大都唔弱，搵咗H & M同埋Dsquared2幫手，件隊服代表到佢哋國家之餘，亦相當有活力同埋時代感。中國又點呢？搵咗國內設計師葉超瑩設計，但就劣評如潮，白色恤衫配紅色同黃色西裝褸，俾網民笑勁似蕃茄炒蛋囉。
不過，大家諗深一層，呢套紅男黃女嘅其實係好有意思，因為一望就知道係中國國旗嘅顏色，真係離幾遠都唔會認錯；再者，中國貴為體壇三大強國之一，套隊服當然要有強國味啦，呢套衫就完全做到要求囉。既然套隊服咁能夠代表中國，同埋突出中國運動員嘅身份，所以真係好有深度㗎，唔明點解啲網民會彈囉。其實中國隊服屆屆都係似蕃茄炒蛋，若然佢哋着到好似美英法意咁，應該冇人會睇得慣。
香港時裝設計師鄧達智早前就喺fb大彈中國隊服：「平心而論，中國隊呢次選擇制服，真係好攞命！」仲貼上三個尖叫emoji，不過貼文之後，個post離奇被河蟹，之後鄧達智再貼番各國嘅隊服叫大家評論，仲留句：「蕃茄炒蛋，中國人至愛！」