現年26歲英國女星愛瑪屈臣（Emma Watson）憑《哈利波特》(Harry Potter)系列中扮演妙麗而全球知名，由於佢成名時只得10多歲，所以喺生活各方面就受盡保護。
最近有愛瑪曾就讀嘅女子中學Headington School舊學生向《The Tab》爆料，指學校為咗愛瑪喺學校免受騷擾，為佢度身訂造咗一條新校規，就係學生唔可以特登靠近佢拎簽名，當然本身同佢係朋友就另計。
報道指該校家長都知道呢個規定，如果犯規三次就要罰留堂。另一個舊學生就話為咗支持佢，只好整海報寫下「歡迎你回來妙麗」。雖然係咁，不過睇番愛瑪同同學影嘅相都相處得好融洽。