就算生得幾靚同幾咁叻，總有派膠嘅一日。里奧女足周三開波，中國門將趙麗娜係就係好靚女，但弊在唔好波，連累「鏗鏘玫瑰」喺E組首場分組賽就吞咗東道主巴西三蛋；至於力爭四連霸嘅美國雖然喺G組以2:0贏新西蘭，不過門將蘇露賽前衰多口寸巴西啲蚊好毒，結果俾現場啲巴西球迷「神回」，係咁叫「寨卡」！
趙麗娜累鏗鏘玫瑰遭蹂躪
呢個世界真係好公平，你睇吓趙麗娜就知。呢位24歲球壇女神之前喺友賽已經派過膠，搞到中國輸畀法國0:3，估唔到佢前日又派多次。中國喺E組首場分組賽輸畀主辦國巴西0:3，有兩球都關趙麗娜事。第一球就係佢打手槌打到唔湯唔水，最終俾巴西後衞蒙妮卡門前輕鬆頂入；到第三球佢出迎又唔知想接波定打手槌，結果兩樣都做唔到，俾巴西前鋒姬絲迪安妮輕鬆頂入空門。
趙麗娜個樣幾省鏡，加上有1米87咁高，驟眼睇成個模特兒咁，但落到場連累球隊輸波，幾靚同幾高都冇用，唯一安慰係佢總算阻止到巴西女球王瑪達入波。呢場冇波入嘅瑪達話：「我差啲入波，可惜俾中國個門將救到，下次我會射好啲。」瑪達因傷退下火線，仲要用冰敷住右膝，但應該冇乜問題，可以喺之後對瑞典同南非嘅分組賽上陣。
球迷嗌寨卡「神回」蘇露
巴西嘅爭金勁敵美國同日亦贏波，喺G組輕取新西蘭2:0，但足智彩[-2]啱啱開「和」，帶挈唔到捧場客。咁都未算，第199次代表美國上陣嘅蘇露，賽前將自己戴住防蟲網同揸住特大裝驅蟲劑嘅自拍相掟上社交網，仲話唔會借畀人，明寸巴西有寨卡病毒，結果巴西球迷向佢還以顏色，幾千人係咁叫「寨卡、寨卡！」搞到呢位35歲門將勁冇癮，惟有借咗聾耳陳隻耳扮聽唔到。
另一奪金熱門德國亦旗開得勝，喺F組大勝津巴布韋6:1，不過呢場波足智彩開德國[-5]，買咗「客勝」嘅球迷真係喊得一句句，反而買咗「客其他」波膽嘅就執番身彩。