網絡紅人「火雞姐」（Yanki Din）早前在網上拍片調侃一眾社交媒體偽ABC女神，超黑鼻影加「零一分界」簡直笑爆嘴。
但講真，身為力求完美嘅港女，要做偽ABC當然要認真做，今次搵來曾經幫娜姐周秀娜、今屆金像獎最佳女主角春夏及Super Girls化妝嘅專業化妝師Meegan Seak，為各位絲打解構偽ABC妝容，原來要化出性感又立體五官，記住以下三招就得。
1.上揚眉毛
「其實偽ABC妝容，重點在於眉和唇妝。」Meegan早前去2016紐約秋冬時裝騷，發現當地人眉妝同港人愛化的淡薄感眉毛有好大分別，歐美女孩堂眉搶眼又夠實在，「代表美國女性獨立和自強的性格。」要化出同類眉毛，可以選擇同韓式平眉講拜拜，稍稍提高眉峰變上揚眉毛，感覺即刻變得有自信同朝氣。Meegan教路，原來先畫眉峰到眉尾部份會容易掌握，亦更易畫出利落眉尾。
2.豐圓嘴唇
一抹紅唇幾乎被stereotype為ABC們簽名式妝容，要畫出性感漂亮唇形，秘訣在於輕輕畫大嘴形，喺唇線位向外畫出少少，唇山唔好咁明顯起角，偏圓嘴唇性感味道更濃。
3.陰影修容
東方人少有西方人輪廓，但一唔小心陰影打得太深就會變老。除咗用比自身膚色深一至兩度的粉底在低光位修飾，Meegan話用粉橙、粉紅胭脂混合亦可達修容效果。記住要由顴骨開始上而下、由外至內在面珠中心掃開，咁就可以即時修容兼瘦面。
記者：黃樂雯