今屆五區地區直選名單，多到選民都未必記得晒，尤其新界東建制與非建制都空群而出，到底點樣可以突圍？組成聯盟都係一條出路！年初新東補選高票當選嘅公民黨楊岳橋，就計劃同俾網民封為「比卡超雄」嘅工黨張超雄組成策略性聯盟，喺選舉中以孖咇姿態，希望一齊冧莊！
張超雄係公民黨前副主席，所以同公民黨嘅理念，唔會相差太遠。而岳少同超雄喺泛民政治光譜中，雖然一個主打中產、一個主打基層，但同樣都係主張公義革新，亦同意泛民用更進擊及新鮮嘅抗爭手法；喺對抗CY嘅專制暴政及建制派霸權更加係意向完全一致，合作冇難度。
八方聽聞今次合組聯盟嘅構思，係喺港大民調出爐後萌生，民調顯示岳少支持度佔優，相信若同支持度未算喺上游嘅張超雄合作，可以確保非建制派喺新東守住6席。張超雄今次選舉口號係「公義同行」，岳少則主打「實踐革新」，據聞決定孖咇競選後，兩口號會合併成「公義革新，新東同行」！該區其他參選名單，請參閱本報立會選戰網站 http://hk.apple.nextmedia.com/legco2016/region 。