ViuTV嘅《跟住矛盾去旅行》，首輯引起社會熱論，新一輯相信同樣精采。八九學運領袖王丹噚日就喺facebook開po，自爆獲邀成其中一集主角，而佢心目中嘅矛盾拍檔，就係曾經鬧香港人係狗嘅北大中文系教授孔慶東。網民都等緊孔慶東點頭，開定花生想睇絕世好戲。
曾鬧港人係英殖狗
王丹喺facebook話有香港電視台邀請佢拍節目，目的地任佢揀，條件係要搵一個有矛盾嘅人同行，旅程中交換意見。王丹初時話諗唔到同邊個有矛盾，無數花生友網民即時留言建議，結果王丹話已向電視台提出人選，就係孔慶東。
港人對孔慶東唔會陌生，佢2012年喺內地電視節目評論中港罵戰時，連珠炮發鬧香港人係英國殖民者嘅狗，仲話「一個字，賤」，激嬲唔少港人。但查實佢同王丹有共通點，就係北大校友，亦係八九一代，王丹直言同孔慶東都算舊相識，但佢呢幾年嘅變化令人吃驚，尤其係對香港人嘅辱罵同支持薄熙來嘅左派立場等。
王丹強調單係觀點，同孔慶東絕對有矛盾，但相信作為大學教師同知識分子仍然可以理性交換意見，最後公開挑機：「這個節目能不能做成，現在，就看孔慶東是不是答應了。」
呢個po引嚟兩岸三地網民熱議，有網民認為「太抬舉孔慶東了」，亦話孔「不是你的水平」，其他獲網民點名同王丹去旅行嘅人，由梁天琦、陳淨心到特朗普都有，但最多人都係想佢同習近平一齊旅行。
李八方
mailto:[email protected]