疑似特首參選人財政司司長曾俊華噚日現身香港攝影記者協會年度頒獎禮，大送高帽畀攝記之餘，唔少攝記亦搵佢自拍，咁受傳媒歡迎，現任嗰位冇得比。
鬍鬚曾睇完今屆得獎作品後話，雖然唔識現場嘅攝記，但平時出席活動都會見到大家，所以有種親切感。佢仲話一直覺得香港傳媒厲害之處，就係可以用蔗渣價錢做出燒鵝味道，有次佢見到有位攝記一手影相一手拍片，連稿都一手包辦，唔知係咪講緊《蘋果》記者呢？
鬍鬚曾亦做埋頒獎嘉賓，包括頒獎畀憑住一張拳擊賽事相片勇奪體育組冠軍嘅《蘋果》攝記何家達，佢同易仰民、謝榮耀同許頌明等攝記為《蘋果》勇奪8獎，八方都恭賀佢哋！