里約奧運即刻展開,但中華台北嘅謝淑薇突然宣佈退出國家隊!呢位30歲網球女將早前因為冇得帶自己嘅教練而放棄出戰女雙,已經惹起唔少爭議,不過佢周四喺fb再爆料,話自己去搵中華代表團副領隊蔡賜爵傾吓里約奧運嘅制度問題嗰陣,後者竟然話:「為咗國家,你忍吓啦!」謝淑薇聽到就梗係嬲啦,話自己係職業球員,亦只會為咗自己嘅粉絲而戰,最後蔡賜爵就拍晒枱咁鬧佢,令佢憤而決定退出國家隊,唔會再委屈自己。謝淑薇嘅老竇謝子龍亦喺fb支持囡囡,仲話要為今次奧運制度不公不義作出抗議,但要過兩日先會宣佈係咪打埋今屆奧運。