效力咗曼聯12年嘅朗尼，球會喺周三同佢搞咗場紀念賽，對手係佢母會愛華頓。呢場亦係曼聯第一場喺奧脫福進行嘅季前賽，氣氛夠晒和諧，但練兵效果似乎一般，強陣出擊但冇波入，0:0和氣收場。
朗尼固然係呢場嘅主角，佢老婆高蓮同埋三個囝囝梗係嚟撐場，開波前仲一齊接受致敬；而曼聯陣容亦多人到坐爆晒後備席，要領隊摩連奴同班助教開摺櫈坐。觀眾席上，兩位朗尼嘅前主帥費格遜同埋莫耶斯，仲有啱啱做英格蘭領隊嘅艾拿迪斯，三巨頭就排排坐睇波。
曼聯同愛華頓基本上都係強陣出擊，不過場波激烈情度只係一般，兩隊下半場幾乎換晒全隊，朗尼到53分鐘亦退下火線。朗尼返埋位同Kai仔一齊睇波，之後見到迪比打倒掛失敗跌咗落地，兩仔爺仲一齊笑佢。場波最終悶和收場，朗尼賽後依然話冇得頂：「今晚對我同家人嚟講肯定係難忘嘅一晚。」曼聯基本上已經完成晒季前賽，到下周日社區盾對李斯特城後，就準備迎接新季英超。
