發財立品是常識吧。有錢人做生意賺到錢，回饋社會，最簡單直接就係捐錢，好似「超人」李嘉誠同「四叔」李兆基，佢哋好重視教育，不時捐錢畀中港大學。康健國際（3886）創辦人曹貴子似乎深明此道，佢旗下「曹貴子基金會」捐咗筆錢畀香港教育大學，對方為表謝意，將校內行政大樓命名為「曹貴子基金會大樓」。
52歲嘅曹貴子乃活躍於股壇嘅屋邨醫生，外表似書生，文質彬彬。根據資料，佢近年落力發展慈善事業，先後成立眾籌網上慈善平台「意贈慈善基金」、心連心行動慈善基金等，「曹貴子基金會」就舊年底成立，今次捐款畀香港教育大學，可能係基金會首個重要項目，主要係支持大學嘅教育發展項目與師資培訓，下星期三舉行命名典禮，到時就知佢捐咗幾多錢嘞。