中國男籃又輸！為咗備戰里約熱內盧奧運，中國男子籃球隊喺周二同東道主巴西進行熱身賽，即使主力易建聯攻入全場最高21分，都要以69:83輸波，近五場熱身賽全部輸晒，連教練宮魯鳴都踩自己班球員離晒地，嚟緊里奧男籃即將喺周六開打，睇嚟中國想喺分組賽贏到一場都幾難。
不敵巴西 近五場全輸
中國今場比賽有郭艾倫同王哲林兩位主力避戰，佢哋喺易建聯嘅帶領下，半場都仲領先緊42:39。不過，喺今年NBA選秀會俾火箭揀中嘅中國球員周琦就表現麻麻，全場只係入得六分，加上巴西喺第三節開始反擊，後衞賓迪（Vitor Benite）攻入13分，加上巴保沙（Leandro Barbosa）射入10分，最終巴西以83:69擊敗中國，後者慘吞五連敗。
雖然教練宮魯鳴喺1996年亞特蘭大奧運，曾經帶領中國男籃破紀錄打入八強，不過呢位58歲嘅中國教練似乎就唔多睇好球隊喺里奧嘅表現喇，佢話：「以前我哋嘅自我感覺良好，以為同一眾勁旅嘅實力相近，但𠵱家先發現差得好遠。好多球隊都習慣喺比賽中有激烈嘅身體碰撞，值得中國好好學習。」宮帥仲話，喺里奧嘅參賽隊伍入面，中國算係弱隊，所以希望陣中嘅年輕球員趁住呢次機會，吸收多啲大賽經驗。中國將會喺巴西時間周六嘅第一場分組賽硬撼美國，而佢哋喺上個月同夢幻隊兩度交手，分別大敗49分同50分。
美籃又租遊輪住
雖然奧運選手村不斷俾各國運動員投訴居住環境差，不過呢個問題就對美國完全冇影響，陣中12位球星都咁有錢，真係冇人會委屈自己住喺選手村啦。據了解，佢哋會同美國女籃嘅球員一齊住喺一艘豪華遊輪上面，呢艘叫銀雲號嘅遊輪有196間房，可以畀400人齊齊入住。事實上，自從1992年巴塞隆拿奧運批准職業籃球員參賽開始，美國就每一屆奧運都會另外搵地方住，而早於2004年雅典奧運，夢幻隊就已經試過租遊輪住㗎喇。
不過，避到選手村啲麻煩，美國嘅勇士前鋒祖蒙特格連（Draymond Green）就不斷惹麻煩上身。當佢日前喺snapchat唔小心公開自己嘅下身裸照後，竟然吸引到一間成人電影公司嘅老闆開價10萬美金（約78萬港元）邀請佢拍鹹片，仲要對手同地方任佢揀！不過出手咁低，好難令格連心動喎！