呂健威近三季頭馬均達30場以上，去季取得38場頭馬，更平了自己在02至03馬季贏馬最多紀錄，馬房在暑期接收了多匹轉倉馬，兵力有增無減，相信頭馬數字仍可維持3字頭。
睇番呂廐頭馬並非倚靠三四歲質新馬，主力反而係已踏入中年之五六歲馬，上季贏三場或以上之呂廐馬，除「幸運如意」屬四歲外，其餘「有智者」、「公証揚聖」及「軍火」皆五歲或以上，故此新季搵呂廐長捧對象，宜向同類份子埋手。至於最值得留意首推「萬馬奔騰」，季尾轉呂廐初出角逐從未贏過的田草賽事，沿途快跟「快無極」下末段竟可彈甩大勝對手而回，確有脫胎換骨之感，六歲馬以往用得不多，難得養回有機會替馬房省招牌。
另外，上季在元旦日五轉六歲之呂廐北半球馬「有智者」、「軍火」、「執子之手」及「精算率然」全部均有頭馬交出，前三駒更贏不止一場，目前呂廐只得「海都巨星」在嚟緊元旦轉六歲，上季能在谷草1200、1650及泥地1200米後上入位，反映質素唔差，只係北半球馬仍需時適應，展望新季再成熟進步，隨時可贏兩三場。