里約熱內盧奧運揭幕禮仲有一日就會舉行，中國傳媒喺周三爆料，上屆奧運贏得男子花劍冠軍嘅雷聲，將會擔任中國旗手。雷聲除咗有望打破中國代表團自1984年來一直由男子籃球成員壟斷旗手一職嘅局面，仲會成為第一位冠軍級中國旗手！
終破32年壟斷
自1984年洛杉磯奧運開始，中國代表團嘅旗手一直都係由男籃成員擔任，包括1984年嘅王立彬、1988年嘅宋濤、1992年嘅宋力剛、1996同2000年嘅劉玉棟、2004年同2008年嘅姚明，同埋2012年嘅易建聯，不過《新浪》周三就突然傳出，劍擊隊嘅雷聲會爆冷力壓易建聯，成為中國近32年嚟首位非男籃隊員嘅旗手。
32歲嘅雷聲係中國男子劍擊隊嘅領軍人物，雖然佢喺2008年北京奧運未能為中國增添任何獎牌，但喺2012年倫敦奧運就贏得男子個人花劍冠軍，幫國家喺呢個項目創歷史贏得首金。其實，雷聲都唔只得運動成績好，身高都好出眾，1米93嘅佢同男籃隊員企埋一齊都唔會輸蝕，而且佢喺2014年仁川亞運，就已經擔任過中國代表團嘅旗手。
另外，唔少國家都會派出冠軍級人馬出任旗手（見附表），例如阿根廷將會由曾經喺2004年雅典奧運奪得男子籃球冠軍嘅「黃金一代」成員史高拉（Luis Scola）出任，而西班牙就會派出喺2008年京奧男單封王嘅網球手拿度（Rafael Nadal），澳洲就有喺2012年倫奧贏得女子個人爭先賽嘅單車手美雅絲（Anna Meares）。