喺人人都可以向全世界直播嘅年代，打風造就咗候選人拉票、提高知名度嘅另類機會。任職民航機師嘅公民黨譚文豪（圖），前晚八號波掛起後，午夜12點透過fb直播，講解颱風襲港下機師點樣因應風速控制飛機上落，喺香港點樣飛走、降落等，呃到勁多like同心心。
短短廿分鐘嘅冷知識，超過2,000人睇直播，半日內有逾萬人睇過，隨時好過落街派傳單增曝光。更重要係呢樣嘢譚文豪「只此一家」，其他候選人統統企埋一邊。
譚文豪話一般打風，香港、澳門、深圳、廣州嘅機場都唔可以上落，機師惟有轉飛台灣高雄機場，但通常一打風，架架機都爭住去呢個機場，所以會冇晒泊位，飛機降落咗都要喺高雄機場嘅滑行道等待，有時惟有轉飛台北或馬尼拉機場休息一晚。