動漫節曲終人散，相信大家影埋唔少靚靚Show Girls，但其實鎂光燈背後每人都各有故事。
有行過Sony攤位嘅可能會俾一班Show Girls制服吸引，原來係出自模特兒兼時裝設計師簡幗儀手筆。做開婚紗同晚裝嘅佢話，希望改變動漫制服好膠嘅印象，做完仲會親自着上身確保唔易走光。
網上有唔少fans嘅美少女樂宜，今年幫Xbox做宣傳，標致面孔吸引龍友爭影。模特兒出身嘅佢原來仲識打碟做DJ，更係電競選手。
佳織同小黑今年拍檔參加動漫Cosplay大賽奪冠。參賽4年嘅佳織憑住堅持，令家人由反對到幫手整服飾，小黑更因為Cosplay而鍾意針黹，打算以服裝設計作為職業。下年大家入場影相之外，會唔會花時間了解吓呢班女孩子呢？
