政府成日忠告市民，打風時要遠離岸邊，「細價樓爆煲論之父」湯文亮就唔聽話嘞。颱風妮妲襲港，佢噚日早上10點趁八號風球高掛，自駕走去石澳、大浪灣同赤柱睇浪，好在佢全程留喺車內，唔算太危險，仲被佢諗到打風同樓市撤辣嘅關係。
湯文亮並非首次打風睇浪，佢都係諗住兜兩個圈就返工。雖然呢個風似係來勢洶洶，但根據佢經驗，佢話，如果打得成好勁嘅颱風，天空會泛紅霞，但打風之前一晚，唔見有咁嘅情況，所以認定唔會打大風。
落波有預告 撤辣冇周期
佢去完幾個沙灘睇浪之後，發覺風力唔算太勁，浪亦唔大，仲見到有人衝浪。佢有感而發咁話，「預測某啲事情，了解形勢比睇數據更緊要。」
好似樓市咁，有危險時出晒預警，即係等於天文台話畀大家知幾時掛八號波一樣，提醒晒買家注意風險，仲出埋辣招打擊炒家。
天文台亦會預告幾時除風球，等大家有個心理準備要返工。可惜，政府與金管局一直冇為逆周期措施，定出一個時間表或者條件，市場根本唔知幾時撤辣，「即係敢起波，唔敢落波！」
佢話，𠵱家睇形勢，佢最擔心嘅細價樓爆煲同銀主盤湧現，都冇大規模爆發，樓市目前已經幾安全，政府係時候做嘢。至少要好似天文台咁，畀少少提示出嚟，咪等市民估估吓。
李華華
mailto:[email protected]