新紮賓架T請飲下午茶，去文華酒店咖啡室，又好啫。以前飲下午茶例牌食件餅，現在人人健康要緊，一定要減肥，故此往往係飲杯伯爵茶（清茶）就算。前星期在馬會停車場見到沈祖堯校長，見佢瘦咗成個碼，肚腩仔不見了，塊面尖晒，問聲：「校長，有乜減肥秘方？」佢話：「晚餐唔食飯，三個幾月瘦咗三十磅，褲要買過晒。」沈校長做事有決心，有毅力，減肥如此困難之事，佢竟然係輕而易舉，服晒。左丁山奮鬥近一年，先至略減腰圍，真慚愧。
賓架T係後輩，大嘆現時銀行難做。佢去過上海做中國業務，結果NPL（呆帳）一籮籮，返香港做商業貸款，貿易融資，遇上香港進出口總值連跌14個月，生意有乜辦法唔清淡吖。左丁山話：「好似話潮流興PB，為大客做財富管理，有冇人搵你轉行？」賓架T答：「早有師兄弟轉咗陣營啦，但sell人客為佢管錢，亦係好難，做前線即係賣財富產品，究竟邊一類會賺錢，自己都唔知，點有信心同客人講呀。」
賓架T羨慕左丁山一代，銀行賺錢容易，銀行貸款經理有地位，出外應酬當返工；左丁山調番轉頭，羨慕賓架T呢代薪水連花紅與天比高，三十年前聞所未聞。賓架T苦笑：「你嗰陣時銀行工係鐵飯碗，現在我地隨時裁員！」
銀行裁員當然係為咗節省成本，希望維持盈利不變，例如東亞銀行裁減本地證券零售員工。東亞逼於如此，正因為一隻美國基金以東亞業績不穩為藉口，逼股東賣盤，東亞管理層要做啲嘢。左丁山有時唔係幾明白，基金代客投資，當然要求表現，但要搵錢有好多方法啫（例如一早買騰訊），呢隻Elliott對沖基金，何苦要買入東亞銀行股權近7%（據報）嚟狙擊東亞管理層？7%東亞股權相等於60億港元市值，究竟想賺幾多？東亞股價在32元水平，市帳率1.09倍，據講Elliott認為東亞控制權值50幾60蚊一股，市帳率去到2.04倍，幾大想頭噃！匯控目前市帳率係0.68倍，渣打係0.58倍，中國銀行（3988）係0.6倍，東亞點解會值2倍？啲基金真係咁識計數？買賣股票賺錢，理應係取易不取難，Elliott還要告上法庭，花錢與東亞打官司，呢種投資哲學，愚蠢如左丁山，唔識破解。或者人地錢太多，60億元投資加官司費，加埋都係濕濕碎，唔志在，係要同東亞李氏家族玩一鋪都唔定，但如此投資activist，在香港環境，恐怕會徒勞無功。