呢個馬房盛產一哩專家

呢個馬房盛產一哩專家

葉楚航自從12至13馬季贏69W封王之後,接着三季頭馬均維持在3字頭,上季贏38W尚算及格。葉廐搏馬最大特色係專攻一哩,上季在1600及1650米合共取得16W,佔馬房總頭馬逾四成,當中尤以田草1600米表現最標青,總共交出十W,成績冠絕同儕,相信今季仍會集中在此程出擊。

要數新季在千六最值得捧場之葉廐馬,首推「神電金剛」及「天才」兩駒。「神電金剛」上季由五班成功反彈,全季累積三W全贏1600米,明顯獨擅此程,雖然比低位已反彈14分,不過目前都只係52分,相比插班時仲要低五分。六歲英國馬現時才大熟大勇,既然最後一勝能壓倒現評78分之「索咖啡」,保守估計「神電金剛」仍有至少兩場頭馬在手。至於「天才」歷來五捷,四次在1600米勝出,而且每次贏來均大把在手,上季二月贏完百年紀念瓶後雖然未能建功,唔排除係幕後唔想用盡一時,留力讓這匹英國馬在新季再用,季初幾項1600米分級賽,包括沙田錦標及馬會一哩錦標,應是此駒主要目標。