財爺曾俊華以「衰工」形容特首，無論真心嗰句係咪「衰公」，似乎唔少人都覺得「銀」耳。繼新民黨主席葉劉淑儀話對「衰工論」反感，前公務員事務局局長王永平亦喺報章撰文指鬍鬚曾「衰工論」唔多妥當，指特首係好工，能為國家同港人作重大貢獻，之不過，「人有好人、衰人之分。好人不一定是個好特首，而衰人卻一定會把特首職位做衰」，寄語鬍鬚曾「惡補中文詞彙」喎。
其實平叔一直退而不休，經常喺專欄論政，佢噚日喺《am730》專欄話喎，雙曾表態令坊間嘅ABC（Anybody But CY）訴求成真，「ABC的A變得有名有姓」，相信會有更多想取代CY做特首嘅人陸續出現，佢話CY顯然冇退休之意，近日仲經常放軟身段，笑臉迎人，似乎為「當仁不讓」嘅時刻做好準備，會以治亂世靠強人嘅姿態做賣點，仲話有心人擔心「槍打出頭鳥」，所以寧願等待北方指示，難怪令唔想CY連任嘅人開始着急。