啲人成日話，最危險嘅地方係最安全，但原來喺里奧最安全嘅地方先最危險！點解？皆因喺上周六，有個女消防員喺里奧單車館瞓覺嗰時，懷疑俾個里奧保安主任強姦。「牛下女車神」李慧詩遲吓就會喺呢個場爭金，希望呢單里奧場館強姦事件，唔會對佢有咩影響啦！
奧運公園都唔安全
巴西治安向來差，所以連當地人都提醒嚟玩里奧嘅各國運動員同埋職員，冇乜事最好留喺奧運公園或者選手村。但係，原來奧運公園先最危險！當地警方證實，上周六深夜四點半，喺單車館內發生咗單強姦案；而據當地傳媒報道，一個女消防員喺單車館入面嘅臨時休息室瞓覺嗰時，不幸俾一個叫費拉拿文迪斯嘅中年肥佬強姦；消息仲話，費拉拿文迪斯係當場被捕，而令人震驚嘅係，佢原來係受僱於一間叫Gocil嘅保安公司，仲係做保安主任，負責喺奧運公園做巡邏工作；家陣佢被控強姦，如罪成最高刑罰係入獄15年。
由於事發地點係喺奧運公園入面嘅比賽場館，犯案仲要係里奧嘅保安，所以外界質疑里奧啲外判公司喺請人嘅時候，究竟有冇做過背景審查囉。
保安主任監守自盜
里奧奧委會亦就此表示：「里奧奧委會絕對唔會容忍任何暴力同埋不尊重行為。如果涉案人士經審訊後證實有做過，就會受到巴西法律嘅制裁。同時，奧委會亦有提醒外判公司喺請人嘅時候，要跟足里奧嘅指引。」巴西啲警察同消防員之前試過上街遊行抗議冇準時出糧，家陣又有女消防員喺奧運公園慘遭強姦，睇怕又會有示威。
里奧周五就會揭幕，臨開波搞單咁嘅嘢，仲要喺奧運公園發生同關里奧保安人員事，一班女運動員唔擔心就假。李慧詩遲啲會喺案發地點進行凱林賽同埋爭先賽，力爭奧運金牌，希望呢單強姦事件唔會影響到佢，等佢可以繼續備戰，為香港爭光；同埋希望李慧詩身邊嘅男士，包括佢教練沈金康會好好睇住佢啦。我哋搵過香港單車隊，但截稿前就未有回應呢件事。