一田百貨前行政總裁（CEO）莊偉忠「退休」3個月之後，本周一開始去咗康宏金融（1019）做CEO，康宏作為一間上市公司，照計委任CEO咁大件事，應該要出通告宣佈，兼且講埋新CEO年薪幾多，但佢哋前日只係出新聞稿，冇出通告喎。
睇真啲，原來莊偉忠只係做CEO，未係公司董事，公司徵詢過法律意見之後，認為可以唔使出通告。不過，上市公司CEO多數係執行董事，點解莊偉忠唔係呢？
消息人士解釋話，委任董事要董事會開會通過，呢次趕唔切開董事會，遲吓應該再有宣佈。
咁究竟係莊偉忠悶得滯，趕住返工，還是康宏今年4月走咗前CEO麥光耀，趕住用人，等唔切董事會開會，就已經要莊偉忠8月1日返工呢？
至於年薪，睇番上手麥光耀，舊年年薪443萬元，莊偉忠應該唔只呢個數喇。