8號風球橫風橫雨，打工仔難得有半日假，有啲企業貼心為用戶發放消息，提醒注意安全。騰訊（700）有份投資嘅富途證券，發畀用戶嘅短訊認真夠特別，似有弦外之音㖭呀。
富途發嘅短訊內容十分有趣，話喺「颱風登陸時」，要盡量關閉屋企所有門窗，最好拉埋窗簾，開關房門最好慢動作，如果動作過大，「嚴重時會導致窗戶破裂並把碎玻璃變成飛刀，這時窗簾會有些許盾牌作用」。又話「如果聽到風吹得窗玻璃在動，盡快遠離玻璃」。
佢呢個「溫馨提示」講到又飛刀又盾牌，概念怪怪地，唔知以為佢發放緊江湖暗語，好似「如果聽到風吹得窗玻璃在動，盡快遠離玻璃」呢一句，其實係咪叫客戶feel到股市有乜風吹草動就離場呢？