築地市場，一個充滿男人味的地方，難得和食加藤由全女班打理，以為會有溫柔待遇？
「小心啲！唔好亂咁郁！」荒井ミヨ子，74歲的老闆娘，睇落就知不好招惹。事實上，整家店的店員都是火爆女漢子，想入內，更加是未見官先打三十大板。舖頭有三不准，不準小朋友入內，不可分享食物，亦不設英文菜單，唔識睇，你嘅事。
就連日本媒體也不多報導的一家店，是築地批發商老闆推薦我們來，行內人也覺得的美味。這裏主打家庭料理，不刻意整色整水，名物汁煮金目鯛用即日鮮製，成個湯碗般大的魚頭，肉厚身得來又夠軟腍。西京燒鱈魚的面豉亦醃得非常香口，看這裏日本客人多過遊客，就知都無來錯。
荒井好似好惡，其實得個樣。比如唔俾小朋友入內，她解釋：「這裏地方窄，凳又無椅背！小朋友搖來搖去，傳菜時好易撞到，所以我才不讓他們進來。」日本食評網中不少網友就說，其實她們不時出來同食客寒暄，又或幫外國客影相，只是講嘢較直腸直肚，就如香港的茶餐廳伙計一樣外冷內熱。
在築地50幾年，雖然不想搬，但問到佢對築地有甚麼回憶時，她又回到一貫語調：「這裏不就是工作場所，我不是來玩的！」
記者：甄俊宇
攝影：伍慶泉
和食かとう
位置：8號館
時間：5am - 1:30pm（星期日及休市日休息）
