正所謂造勢不如趁勢，呢期咁興Pokémon GO，個個化身訓練員，四出捉精靈。一批立會參選人都唔執輸，各自食住Pokémon熱潮抽水宣傳，最重要都係搶到選民眼球同支持。
好似人稱哪吒嘅新東參選人方國珊，直頭玩埋cosplay，喺政總外以「小智」造型手握精靈球，仲以訓練員「小方」自居，話多年來走遍香港每個都市，就係為咗收服破壞香港幸福嘅小精靈，今次出動就係收服「地鐵海盜及立會懶豬」喎！改到個名咁趣怪，相信都係講緊港鐵年年加價同埋立法會大懶蟲！
為拍片專登買服飾
八方問過「小方」，佢話已經製作咗立會大懶蟲短片，不日就會播放，等大家知佢唔係齋講冇行動；而佢身上服飾，都係特登去買嘅，事關要捉精靈，梗係要做到足喎！
大家走遍天涯海角捉精靈之時，又知唔知立法會內，早就有一隻為人熟悉嘅「精靈」？因為工黨張超雄今屆立法會任內，為力阻網絡23條惡法，將網民作品《我女朋友叫我扮比卡超》嘅故事帶入議事堂，仲因此被網民封為「比卡超雄」。
再戰新東嘅超雄最近就進行二次創作，如果大家想令比卡超雄繼續留喺議會，希望各方朋友可以成為義工兼投票支持，令比卡超雄繼續為網民請命！點先可以捉住比卡超雄？唔使用精靈球，唔使餵佢食木莓（Razz Berry），更加唔使行到成身汗四圍搵，只要9月4日去票站投票就得。有興趣做義工嘅朋友可以去呢度睇睇 http://bit.ly/2a4fyjb 。
李八方
mailto:[email protected]