昨日講及美國聯儲局「太白」，民主黨政綱就認為將來聯儲局話事人，特別係公開市場委員會（Open Market Committee，即可決定加息減息嘅委員會）成員，應該組成多元化，意思係加入多啲有色人種及女士為委員。
有色人種或女士入咗聯儲局，表現diversity一面，其實未必有意思，因為呢班人多數係經濟學、金融學博士，大學嘅學院訓練基本上相同，而且來來去去，走不出哈佛、耶魯、MIT、普林斯頓、芝加哥、史丹福、柏克萊呢幾間大學嘅經濟系，講經濟學思想就全部差不多，思想上毫不多元化。從另一角度睇，如聯儲局成員來自不同州立大學，由有馬克思經濟學派、社會主義派、凱恩斯派、芝加哥學派、奧國學派，又有埋工程師、企業家、會計師、銀行家嘅話，各人不同膚色，男女各半，成員真係多元化咯，但每次議息都有十幾種意見，開會鬧大交，聯儲局決策機制咪會癱瘓？
美國今日嘅弊端之一就係盲目追求多元化、政治正確，於是出咗一個狂人特朗普，居然甚受歡迎，左丁山並非學術界人士，但多年來在金融界傳媒界工作經驗所得，認為美國自從1987年大股災之後，長期擔任聯儲局主席嘅格林斯潘（1987年8月11日上任，兩個月後就發生股災）一上台就受到打擊，以後耿耿於懷要維持股市穩定，一見有事就立刻減息支持股市，於是有了Greenspan Put之說（即是話，股市跌就可以將股票沽予格林斯潘為代表嘅聯儲局），慢慢就打造咗一種股市只升不跌，每大跌就有聯儲局救命嘅信仰，於是帶動咗金融泡沫之產生；華爾街放膽製造衍生工具，次按債券，卒之一發不可收拾，釀成2008年之金融海嘯，2006年接棒做主席嘅伯南克又有Helicopter Ben（直升機撒錢）嘅外號，比格林斯潘更進一步大搞量化寬鬆（QE），死都唔俾股市跌下去。QE嘅直接效果就係貧富差距不斷擴大，無錢在手買股票嘅，永遠落後於人，有錢買股票嘅，有賺冇蝕（要買大藍籌），跌親就有央行托市救命。久而久之，社會上中下階級唔怨氣沖天先至係奇事，美國民主黨居然認為聯儲局要僱用多啲有色人種，不及其餘，可見其淺薄。各央行強行維持超低利率甚至負息，對退休人士剝削，好唔公義。偏偏發達國家嘅老人愈來愈多，佢地嘅儲蓄收益愈來愈低，又會成為社會另一股大怨氣。