巴西里約熱內盧奧運就嚟開幕，沙田新城市廣場特別設置里約競賽3D動畫LED屏幕裝置，相信係全港首個豎立商場嘅運動展館。展館外形係蜂巢嘅六角形，並利用場內嘅拱形玻璃天幕採光，原來係由2008年北京奧運場館「水立方」設計師Chris Bosse同團隊LAVA創作；館內以清明上河圖為概念，將118萬平方呎嘅巴西里約場館，納入2,500厘米（25米）超闊環迴LED螢幕。
奧運版清明上河圖內一班3D立體運動員，會喺9個分別仿照里約實景嘅運動場館內參加射箭、田徑、跳水、劍擊等賽事。由於以3D動畫形式呈現，穿梭其中就可以感受到奧運氣氛。場館內亦展示咗其他運動項目嘅比賽短片，一次過可以盡覽39個運動項目嘅精髓。