【文化籽：字裏凡間】
「搞咗咁多年，讀大學時講嘅四仔（車仔、屋仔、老婆仔、BB仔）觀念已經因為冇錢而唔存在喇。我哋呢啲年紀都係買唔到樓，不如寄情自己鍾意嘅嘢，買吓波鞋、威士忌、figure咁，其實都是一個心靈抵銷或填補嚟㗎啫。」電台DJ蒙為亮（阿O），自稱財子O，從小就有鋪儲波鞋癮，惟某年爸爸破產，他變賣波鞋珍藏幫補家計，竟賣到二萬多元，為他打開了玩物式的投資之門。又曾以38萬買車位，兩個月後賺十多萬元。最近出了本新書《另類投資知多D》，講嘅係從買賣了解文化，過癮時又有少少錢賺，真係正能量爆燈呀！
「𠵱家成個媒體都標榜一件事，儲十年錢買居屋終於圓到上車夢，啲人喊晒流晒眼淚咁，又話唔食唔着唔去旅行咁。」但到你真係買到層樓想搞house warming時，發現自己過去十年已失去朋友圈，「到時你買完樓大家只有分錢同離婚㗎咋，因為當中冇生活嘛，個價值觀真係錯晒！大家唔係恭喜你買樓，係歡迎你加入捱一世行列。」好似好誇張，但望住堆新聞，同電腦隔籬個兩餸飯又好真實，眼淚在心裏流。
不過戴番頂頭盔先，阿O強調犯法嘢同生活必需品誓死不炒，炒黃牛飛犯法；我哋都會有下一代，炒奶粉會有報應；去日本藥房狂掃藥品，人哋有病點算？「𠵱家連龕位都炒，政府名正言順推廣海上撒灰。呢啲真係血淋淋喺香港發生緊嘅事。寫呢本書就係想開另類投資之門，不是叫大家做一個仆X。」講到尾，無論是「炒」還是「投資」，都不過係股心癮，反正你愛甚麼，就會多看資料細心鑽研，賺回來的錢查實都係買第二對波鞋箒，「買得開心，又可以賺返啲錢，對沖吓張去日本買嘢嘅機票都好。但你唔買某對波鞋唔會跳唔起打唔到籃球㗎嘛。」
波鞋升值勁過股票
「投資威士忌玩具figure也不會賺到首期嘅錢返來，但你會有癮，你會開心你會慢慢想多了解，今時今日另類投資都好專業化。」早十年阿O投資波鞋仍停留在去旺角交收的年代，𠵱家？好多事都在網上全球化系統化了。波鞋買賣入門第一件事，係走上網站Stock X，看看每日全球不同波鞋的供求走勢，「因為有網上資料，個透明度及價錢也可做到即時報價。」事實上時至今日Jordan波鞋都仲有價有市，但已經唔係佢玩晒。好似adidas做好多crossover，都去到好高水平。對Yeezy Boost就係好例子，三千多元炒上過萬：「嘩！我夠膽講今年冇一隻股票能由三千幾蚊彈到上萬幾蚊。」加上奧運年，奧運產品應運而生，大家話唔買唔炒又話只作收藏，轉個頭又會有人向你問價了。放波鞋網除Yahoo同eBay，還有Kickz-Lab.com。
如果你愛杯中物，從研究中多學相關知識，最簡便是看《Whisky Bible》！得獎的威士忌都可鹹魚翻生。除了買25年以上的酒，升值潛力較高外，都要看潮流。例如現在流行日本威士忌，一瓶2011年出產的山崎50年，兩年前在Bonhams拍賣會上以25萬成交，升值三倍多。香港威士忌交易所是活躍的放貨地。
高lv訓練員戶口有價
上星期《Pokémon GO》一街都係訓練員，英國女教師即全職捉小精靈，賣高Level訓練員戶口，據聞花兩日升到Level 15已可索價千幾二千蚊，真係靈機一觸就有錢執。
月餅炒到有二創
乘着強國「大陸嘢唔敢食」同三不五時送禮風，舊年喺淘寶網上，半島酒店嘉麟樓的奶𤏸月餅，就由原價$485炒到神奇的$1,200。今年官方網上訂購訂到明天，但係網上已經又出現疑似「二創」月餅以$550開售。有冇得炒，還看明日之後喇。
千歲鷹升值十倍
千禧年後的LEGO系列式套裝一直炒得起，早排先有新聞故事，講金融才俊辭工賣LEGO。最勁的有《星戰》系列千歲鷹10179，據聞上市價最低375美元（約$2,900），曾斷市一段時間，至今Amazon竟開價5,899美元（約$45,783）起，升值十倍！
記者：陳慧敏
攝影：楊錦文
編輯：黃仲兒
美術：楊永昌