新民黨主席葉劉淑儀對曾蔭權不嬲都唔多支持，早前仲話過因為聽聞煲呔做特首就返嚟救港，煲呔派系嘅財爺曾俊華自然唔係佢杯茶，難怪噚日喺選舉論壇表明，寧要民建聯曾鈺成都唔要鬍鬚曾，仲話鬍鬚曾形容特首係「衰工」令佢好反感。
商台噚日舉行港島區立會選舉論壇，葉劉回應主持人問及CY、曾鈺成同曾俊華中揀邊個做特首時話，儘管同鬍鬚曾係舊同事，但對方日前指特首係「衰工」嘅言論令佢反感，「做行政長官係崇高使命，點可以當打份工？好似佢恩公曾蔭權一樣！」
寧揀曾鈺成做特首
佢表明如果三揀一，寧願揀曾鈺成，「（至少）同各黨派可以溝通，我比較尊敬佢」。點解唔揀CY？佢話大家都係行會成員，不便評論。
問到佢一旦當選立法會議員，會唔會辭職參選特首？葉劉強調一定唔會咁做，但係就冇直接回應，佢究竟係咪唔選特首，只係抽水話「有啲人話N屆唔選，都係去選」，佢強調現階段只會做好立法會選舉工程喎。