正方形、人面西瓜係日本仔撚手菜，香港仔𠵱家都有自家心形青瓜、星形青瓜喇！呢批有機形狀青瓜，係由本地有機農場種植，佢哋係錦田大江埔村、錦上路、上水古洞等默默耕耘嘅農友，唔鍾意用化學農藥，只用有機方式耕種。
統籌農友「Rooftop Republic雲耕一族」嘅Andrew話，喺青瓜苗起花時已經要做預備，當青瓜果實長大到兩至三吋，可以放喺心形或星形膠模裏面。呢個係關鍵時刻，過早或過遲套模都會影響成形，天氣少少變化都會有影響，所以要小心照顧。若一切順利，5至7日後青瓜會長成心形或星形，可以採摘。
日本最近都新興心形風乾檸檬片，想試吓呢啲形狀青瓜、檸檬，8月3日起可到期間限定嘅銅鑼灣「Natural Mix Market」免費登記參加workshop，喺導師指導下，用本地農莊直送農產品炮製健康美食。