【永不放棄】【不能吃的苦】排骨妹21歲起小腸唔郁

【永不放棄】【不能吃的苦】
排骨妹21歲起小腸唔郁

【本報訊】5呎4吋高、僅得100磅重的何燕珊,身形纖瘦自小被叫「排骨」,食少少就胃痛屙嘔,試過食半塊木瓜,就飽足全日,一直以為腸胃差,怎料,21歲那年有一天突然肚脹劇痛,嘔吐十多次,更嘔出一灘鮮血,立即急症入院,醫生發現她腸道有一個黑影,須立即開刀。離奇的是,開肚後醫生找不到黑影,反而發現她的小腸無法正常蠕動,原因不明。

記者:張珮琪 攝影:梁瑞帆

「佢哋(醫生)話搵唔到個影,淨係見到我啲腸唔識郁、脹晒,冇手術可以做到。」被診斷為小腸無法蠕動吸收的燕珊(30歲),一度靠輸營養液入心臟血管吊命,病情更影響器官衰竭。

受盡病痛折磨的燕珊,23歲時經歷第二次手術切除部份小腸,原打算術後在肚皮駁喉餵奶但告失敗,要繼續透過心臟血管輸營養液,令她變得更消極,「我食唔到、瞓唔到、屙唔到,連沖涼都要人幫,覺得自己好慘好可憐!又要辛苦啲人嚟探我,屋企人又擔心,嗰刻覺得好灰、人生冇晒意義,我選擇拔喉等死!」

儀器嗶嗶作響驚動醫護人員阻止她,「(女)醫生企喺我床邊見我咁辛苦,佢企喺度喊,我記得佢同我講:『燕珊,其實睇到你咁辛苦,我哋讀咗咁多書、咁專業嘅醫生都幫唔到你,我哋將你個case攞去外國研究,教授都話冇方法幫你嘅時候,其實我哋覺得好無奈……。』」

那一刻,醫生的眼淚軟化了燕珊,「佢捉住我隻手話我乜都做唔到,只可以為你祈禱,我嗰刻心情突然間平靜咗,好似天使一樣」。其後她藉信仰尋回生存價值,現時她病情反覆,要靠止痛藥及意志對抗病魔,狀態好時仍能少食多餐,自行排便,相反就要入院插喉,抽取積聚體內的食物殘渣。

正因為生命無常,她珍惜一分一秒做有意義的事,早前以簡單粵劇造型為老人院長者獻唱粵曲,向病人分享經歷,「我𠵱個病唔知幾時會病發,呢一刻可能好開心同您哋唱歌、分享,但下一刻,我啲腸唔識郁嘅時候,就要返去醫院」。

丈夫Bill跟燕珊拍拖時也曾成為她的「出氣袋」,但他一直無怨無悔:「我鍾意呢個女仔,冇諗過要離開佢!」兩人結婚4年,他記得當時燕珊病情欠佳,連婚紗相也影不到,知道太太經常無食物落肚,所以二人不時把握機會嘗盡美食,特別愛吃自助餐,燕珊嗜食甜品,雖然每次點了數款甜品都只能淺嚐,但丈夫總會為她吃下剩餘的,心中只想陪愛妻走下去。