日前本報報道內地演藝圈盛傳因韓美不顧內地反對，南韓部署「戰區高空防衞導彈」（THAAD，外界稱「薩德」系統），有傳中央下指令要廣電局趕絕韓星。
封殺韓星傳聞一出後，官方未有正面回應，而昨日《新浪娛樂》就報道經求證多位業內人士後證實：「總局確有意向針對韓國藝人喺內地演藝活動進行限制，但準確來說應為『調控』，而非傳聞嘅封殺，但對近年來華發展頻繁嘅韓國演員同導演以及再度興起的韓劇引進，此消息恐怕將係一記重創。」
所謂嘅「調控」即喺審批韓國藝人方面嘅政策收緊，韓國藝人恐怕會有一段時間內更少時間出現喺內地嘅影視作品、綜藝、活動商演、代言等演藝活動中，至於正在播出或已經拿到審批許可證嘅就唔受影響。
雖然呢個調控令未有官方機構公開承認，但根據新浪指業內人士都知道事件，部份電視台亦都開始做嘢，唔再播韓劇同埋綜藝節目都唔再包含韓國藝人。
據知現時熱播緊嘅韓劇《任意依戀》就唔受影響，但原本計劃喺8月29號首播嘅韓版《步步驚心》以及李英愛10月播出嘅《師任堂》，就有機會有變數。
不過據本報收到嘅消息指，上周廣電局已召喚各大電視台台長，以口頭傳達封殺令，表示中央會因為薩德部署而向韓國施壓，中央會因應韓國嘅反應再作動議。據知原本《小時代》嘅導演郭敬明有意邀請BIGBANG嘅其中一名成員擔任其新作嘅主角，但因為封殺令，所以佢哋現時都唔敢用。