台灣舞王羅志祥（小豬）前晚喺台北小巨蛋為「瘋狂世界」巡唱舉行尾場騷，表演嘉賓一直保持神秘，原來小豬請咗舊愛Selina（任家萱）撐場，兩人自06年分手後，相隔10年後首度同台，當小豬演繹《一支獨秀》時突然由升降機落台，之後帶Selina驚喜現身，觀眾尖叫拆天。
着吊帶衫襯煙熏妝嘅Selina化身dancer，挨住小豬身邊上下游走，舞蹈又挑逗又性感，佢僅熱舞1分53秒就落台，小豬笑問觀眾：「今天的嘉賓有沒有比昨天厲害？我們再給Selina掌聲鼓勵。」佢私下更感慨表示：「圓了多年的一個夢，一切盡在不言中。」
讚Selina滿分
至於兩人點解喺台上唔傾偈？Selina表示擔心變綜藝場，當初佢驚自己跳舞出醜，諗咗一星期才答應演出。小豬喺慶功宴上笑住話：「希望二人合體可以擠進2016年娛樂圈10大事件之一。」
小豬爆喺一個月前請Selina做嘉賓，但佢因當時身材肥嘟嘟，所以特別為演出減肥，佢大讚Selina表演滿分：「我欠她一頓飯。」問到點解三場騷都唔見內地女友周揚青，生日有冇收到女友祝福？小豬坦言有，但問到戀情依舊扮儍避談。
撰文：馮仁昭
