【《蘋果》專訪】若果要講出葉德嫻（Deanie）、倫永亮與趙增熹三人共同點，答案必定是「音樂」。他們將於下月23及24日在灣仔會展舉行「葉德嫻．倫永亮．趙增熹．香港管弦樂團《紅白藍》演唱會2016」，日前三人在尖沙嘴接受本報專訪。平日散發澎湃氣場的Deanie姐，與倫永亮和阿熹合照時，變成貪玩大細路，三人不停嬉戲整蠱。
Deanie姐表示之前香港管弦樂團曾邀請她合作演出，但今次卻是首度合作，她解釋說：「以我性格嚟講，我唔可以俾你限住我做嘢，我成日覺得好多突發嘅嘢係會有神來之筆，若果你將呢樣嘢箍死咗，我覺得冇機會享受突如其來嘅驚喜。」
夾管弦樂有限制
首次嘗試在規範下演出，Deanie姐仍堅持自己享受即興演繹方法，但這次決定了依從規限便不會後悔。既然Deanie姐不喜歡演出受束縛，那麼又為何接受邀請？Deanie姐搞鬼地扮無奈說：「今次答應做，係睇吓自己年紀都唔差幾多，我唔得㗎啦。」在旁的倫永亮竟和應說：「睇得出。」Deanie姐聞言即向他說：「畀啲錢我，我都好大使，我都冇幾耐，要使盡佢。」
不過，阿熹強調會給予Deanie姐即興機會，他說：「與管弦樂團有一個合作限制，佢哋90個人綵排時間好珍貴，我哋好難同佢哋90個人一齊夾，惟有我哋夾好晒，再話畀佢哋知點樣幫我哋做已落實嘅嘢。」阿熹並再次向Deanie姐保證可以享受即興，只是夾好後，到演出時便要乖乖地跟着唱。
採訪：馬建華
化妝：Stephen Lau of Stephenmakeup（葉德嫻）、Angel Yip（倫永亮、趙增熹）
髮型：Seiko Sin of Hip Hair Culture（葉德嫻）、Eden Yip of ll Colpo（倫永亮、趙增熹）
服裝：Hugo Boss
場地：Intercontinental Hong Kong