馬匹在快活谷大勝(拋離對手三身位或以上)，再出如果唔轉路程，原來分分鐘贏到你唔信。
講緊係上季打叠四Win嘅「多多勁驥」，2月於谷草1200米大勝對手三又四分三馬位，取得本身第二Win後，再出兩仗繼續跑同程均順利再贏，奠定此程專家地位。
另一匹同類分子係「發明小子」，上季首次角逐谷草一哩，即可以四又四分三身位輕取對手，翌仗路程不變，繼續發揮此程威力連捷，新季五歲肯定未盡，有權再於同程稱霸。
至於田草大勝完唔轉路程之馬，上季代表作當然係「發盈喜」，首Win在田草1200米大勝，其後三仗再攻同程全面報捷，成為上季最大進步馬，確係實至名歸。