美國民主黨選出希拉莉克林頓為總統候選人，創下歷史，就是美國卒之有咗第一位女士競選總統，如果希拉莉喺十一月大選擊敗特朗普，當然會再次改寫歷史㖭，就係成為白宮第一位女主人，更妙嘅係，第42任總統克林頓會成為美國「第一丈夫」，角色與1992-2000年八年間，剛好調轉，同樣係一項歷史紀錄。
希拉莉與克林頓呢對美國政壇活寶貝縱橫美國政壇逾三十年（由克林頓做阿肯薩斯州州長計起），至今影響力不衰，可算異數。克林頓總統在七月二十八日在民主黨代表大會第二天發表演講：從1971年耶魯大學法律學位初識希拉莉講起，以至拍拖求婚等故事，襯托出希拉莉年輕時就有心服務社群，不以耶魯律師賺錢為目的，為咗做義工，不惜延遲一年畢業，成篇演講，大打溫情牌，引來民主黨人歡呼掌聲不絕，而特朗普陣營當然攻擊佢炒冷飯，空洞無物。
希拉莉要打敗特朗普，必須得到非洲裔黑人、拉丁裔、亞洲裔，及白人女士嘅大力支持，理論上應該可以險勝特朗普嘅白人男人選票，故此民主黨競選政綱中有講及diversity（多元化），估唔到嘅係，首當其衝，備受壓力嘅係聯邦儲備局！民主黨認為聯儲局太過白色，應盡快多元化，因為：（一）聯儲局高級職員有231人，八成二係白人。（二）所有高層決策委員會委員冇一個係黑人或拉丁裔；（三）十二個地區聯儲局之中，十個總裁係白人；（四）除咗主席耶倫之外，所有掌權決策人係男人；（五）高盛及花旗前高層經常加入聯儲局，兩者與聯儲局關係太密切。
好嘞，假如希拉莉當選總統，民主黨政府必定逼使聯儲局決策人多元化，加多啲顏色，令聯儲局唔好太白。如果成事，對聯儲局政策（例如加息）以至香港，會有乜影響？膚色唔通同加息減息有關係？其實所有央行人員都係經濟學、金融學專家，讀博士學位所得知識，學嘅理論，自1930-2006年，絕大部份相同，若非凱恩斯學派就係佛利民思想，或兩大流派之變種，西方精英大學經濟學課程好少重視馬克思社會主義理論。換言之，聯儲局無論增加幾多個黑人，幾多個拉丁裔亞洲裔，相信經濟思想都係一樣一元化，民主黨政綱只係追求形式多元化，令有膚色女性更多機會加入聯儲局而已。