【本報訊】上周四爆出細價股斬倉潮，投資者一不留神，手上股份隨時變牆紙。證券業協會主席繆英源建議，為有風險的股份加上簡單易明的記號，助投資者辨識「睇路」。
繆英源接受專訪時指，香港市場容納國際投資者，「唔係個個都咁熟悉香港」，遇上大股東押股、董事或核數師跳船、重大股份轉移、遲出業績、股權集中等情況，投資者未必跟貼公告，難以一眼知道股份有風險。
他建議為出現上述問題、有潛在風險的股份，加上簡單易明的標記，「如一有問題，即刻轉做9字（頭）。咁大家一睇就知，小心啲，睇吓發生乜事」。他指標記只為提醒投資與否「由股東選擇」。以股權集中警告為例，他認為證監會「應要做得更好……要有責任，唔係出完（警告）就算」。
他更希望交易所「行多一步」。港交所（388）為香港獨家營運交易所，甚至獲《競爭條例》豁免。繆英源認為，既有壟斷市場的權利，就應該有相當義務，「雖然上埋市，要為股東利益着想，但都係公用事業，係咪要承擔一啲社會責任呢」？
促港交所發展多元化產品
他形容現時市場「獨沽一味，得股票」，定息產品、商品期貨等發展欠佳，故交易所應發展更多產品，吸引投資者和資金聚集於香港，他相信業界願意分擔成本，「如果我哋提供嘅服務20年都唔變，你會唔會用返20年前的價錢畀我」？若然一成不變，香港優勢很可能3至5年內耗盡。