旅遊業及零售業搞咗個「WE LIKE HK」網上平台，介紹香港「食、買、玩、睇」四大主題，鼓勵全港市民尋找香港身邊美好的事物，希望牽動社會凝聚正能量，令開心快樂氣氛喺社區蔓延。一向愛扮鬼扮馬嘅「蘭桂坊之父」盛智文擔任活動召集人，噚日仲着住粵劇戲服出席喺沙田馬場舉行嘅啟動禮，大收宣傳之效。
喺立法會同特首選舉前夕，搞個平台有乜特別意思？盛智文話希望透過呢個活動，表達香港團結和諧美好嘅一面。咁佢支唔支持梁振英連任？抑或支持財爺曾俊華去馬？盛智文冇直接回應，只稱邊個做特首都好艱難。
香港汽車會會長余錦基就話，今年10月首次喺香港舉行電能車方程式Formula E盛事，會邀請低收入家庭兒童免費入場，屆時會有10幾個國家現場直播，仲有嘉年華會同電動科技展覽活動。