特首戰未選已經好精采，睇住財爺曾俊華不停出招，想爭取連任嘅梁振英，冇理由坐以待斃嘅，噚日兩人喺網戰過招！針對鬍鬚曾港中大戰撐港隊攞晒分，唔多本土感覺嘅CY都照辦煮碗，借香港跳繩隊喺國際賽揚威大讚「港隊好嘢！」；鬍鬚曾則繼續力sell永不言敗嘅香港精神。雖則隔住個mon，八方都感覺到火光熊熊！
執輸行頭慘過敗家，所以一度唔肯喺港中大戰撐港隊嘅CY，都要為咗連任立場放軟，得悉香港跳繩隊日前喺瑞典舉行嘅世界跳繩錦標賽上刷新世界紀錄，並於「交互繩速度接力賽」中奪冠後，喺facebook兩度讚「港隊好嘢！」
鬍鬚曾：never say die
但網民當然唔多buy，有人留言「689學曾俊華支持體育，人哋已經好早好早支持，好多時親身去現場打氣，你呢？」
另一邊廂嘅鬍鬚曾繼續逢周日一blog呃like，喺網誌重申早前喺預算案引用母校喇沙書院嘅口號「never say die」，係希望藉此鼓勵港人即使對香港嘅情況感到憂慮同氣餒，甚至認為眼前嘅困局難以突破，都要永不言敗，以「never say die」嘅香港精神，「迎接眼前和未來的挑戰，不放棄自己，也不放棄香港」。
網民對鬍鬚曾呢番借打氣暗喻選特首卻非常受落，有人留言打氣「衰工惡做都照去，never say die。曾俊華加油！」記住，鬍鬚曾日前話特首係「衰工」唔係「衰公」，坊間唔少人唔只有心定無意搞錯呢？
李八方
mailto:[email protected]