陳冠希（Edison）為超模女友秦舒培出頭，辱罵林志玲事件不斷有新發展。本報前晚攞到三條疑似工作人員同秦舒培嘅對話錄音，佢喺錄音中多次提到林志玲唔用佢參加：「說得直白點，林志玲那邊不讓你參加節目。」《我的新衣》製作人曹青表示聲帶男聲非節目人員，表示超模人選透過代理經理人公司，從來冇直接洽談過秦舒培。
錄音男主角即代理經理人公司噚日喺微博解釋事情始末，表示口舌之快以「志玲」向秦舒培交代未獲取用原因，𠵱家向無辜被牽連嘅林志玲道歉。林志玲經理人閻柔怡昨表示：「現在終於真相大白。」秦舒培噚晚約8點半，喺微博貼咗兩張同一個叫「我的新衣導演」嘅人嘅微訊對話截圖，又話：「逼問指責？為甚麼大家一直說謊？」對話中明顯同「紳士風度香」嘅截圖有出入，到底誰是誰非下回分解。
撰文：馮仁昭
